Blas o’r Gymraeg

“Croeso… Bore da… Prynhawn da… Sut ‘ych chi?” Dyna’r cyfarchion glywyd yn Neuadd Caerwedros ar fore Iau, 20 Ebrill, wrth i 15 o’r trigolion lleol ddod ynghyd i gael eu blas cyntaf o’r Gymraeg.

Braf oedd gweld 15 wedi ymateb i’r cyfle a ddarparwyd gan Bwyllgor Neuadd Caerwedros ar y cyd â’r Ganolfan Dysgu Cymraeg Cenedlaethol. Bydd 5 sesiwn yn cael eu darparu yn rhad ac am ddim er mwyn i bobl leol gael rhoi cynnig ar ddysgu rhywfaint o Gymraeg sylfaenol.

Parch Beth Davies, ficer Llanarth a Gwenlli, yw’r tiwtor a chafwyd hwyl fawr yn ei chwmni. Yn dilyn y sesiynau dechreuol bydd cyfle i’r siaradwyr newydd (dysgwyr) ddilyn cyrsiau eraill y Ganolfan neu sefydlu grŵp sgwrsio yn y Neuadd.

Dydy hi ddim yn rhy hwyr i ymuno. Dewch draw i Neuadd Caerwedros ar fore Iau rhwng 10yb-12yp tan 18 Mai. “Pob hwyl!”