gan
Robyn Tomos
Ryland Teifi
Bydd dathlu nawdd sant y cariadon yn dwyn “atgofion melys yn llawn alawon,
storïau a chwerthin” i’r cof, yn ôl y perfformiwr amryddawn Ryland Teifi. Ac yntau
wedi hen ymgartrefu yn yr Iwerddon erbyn hyn, bydd Ryland yn dychwelyd i’w
gynefin yn Ffostrasol i gynnal ‘Noson Dathlu Santes Dwynwen’ yn neuadd y
pentref.
“Dwi ddim yn cofio’r tro ola’ i mi gamu ar y llwyfan yno ond mae’r atgofion
serch hynny’n llu – o sioeau Nadolig Ysgol Gynradd Capel Cynon i nosweithiau
cawl Dydd Gŵyl Dewi,” meddai’r actor sydd hefyd yn cyflwyno’r rhaglen deledu
‘Dechrau Canu Dechrau Canmol’. Ond yr atgof mwyaf sydd ganddo o’r neuadd
yw’r noson anfarwol honno yn y 1980au pan gynhaliwyd yr Eisteddfod Werin yno.
“Y Clwb Gwerin oedd yn gyfrifol am yr achlysur ac unigolion fel dad, Emyr Llew,
Elfed Lewys a Dai Erwlon oedd y tu ôl i’r cwbl. Dwi ddim yn credu i Ffostrasol weld
y fath noson gan fod pawb yn y pentre’ bron yn cymryd rhan.”
Ac mae’n siŵr y bydd cyfoedion Ryland a aeth i Ysgol Dyffryn Teifi, Llandysul yn
dal i’w gyfarch fel ‘Siop’ gan ddilyn yr arfer o gyfeirio at bobl yn ôl enwau eu
cartrefi (arferai ei rieni Garnon a Linda Davies gadw siop y pentref). Gallwch
dynnu’r bachgen o Ffostrasol ond allwch chi ddim tynnu Ffostrasol o’r
bachgen, medden nhw.
Ond er yr agosatrwydd, bydd dod adref yn brofiad chwerw-felys iddo hefyd,
meddai, “Mae dychwelyd i berfformio yn neuadd Ffostrasol yn bleser ac yn
anrhydedd ond mae’n orchwyl emosiynol hefyd. Doedd dim llais cryfach yn y
pentre’ nag un dad ac fe fydd ei absenoldeb e’ a fy chwaer Tresi yn amlwg ac yn
anodd,” meddai am ei anwyliaid a fu farw o fewn wyth mis i’w gilydd.
“Mae’r pentre’ wedi colli sawl cymeriad dros y blynyddoedd ac rydych chi’n gweld
eisiau’r rheiny’n fwy pan mae pawb yn ymgynnull mewn lle mor gyfarwydd â’r
neuadd. Allwn ni ddim dianc rhag y lleisiau mawr sy’ yn y gwynt o gwmpas
Ffostrasol ond rwy’n freintiedig ‘mod i’n gallu rhannu ambell i stori amdanyn nhw
yn y sioe. Rwy’n edrych ‘mlaen at ddod gartre’.”
Cynhelir Noson Dathlu Santes Dwynwen, dan nawdd Ffrindiau Ffostrasol a’r Cylch,
yn Neuadd Ffostrasol ar nos Sadwrn, 27 Ionawr 2024. Tocynnau a manylion
pellach: Owenna Davies: 01239 851402